Trygging hagsmuna með gagnsæi og langtímahugsun

Ég vil sjá VR sem sterkt, framsækið og traust félag sem horfir lengra en næstu kjarasamninga. Félagið þarf að byggja á skýrri framtíðarsýn og langtímaplönum sem tryggja réttindi, kjör og öryggi félagsmanna til lengri tíma.

VR á ekki aðeins að bregðast við breytingum á vinnumarkaði, heldur vera skrefi á undan. Með markvissri stefnu, ábyrgri stjórnun og virku samtali við félagsmenn getum við mótað sanngjarnan og sjálfbæran vinnumarkað sem tekur mið af tæknibreytingum, lýðfræðilegum breytingum og breyttum þörfum fólks á ólíkum stigum starfsferilsins.

Ég legg áherslu á opna upplýsingagjöf og reglulegar uppfærslur til félagsmanna um ákvarðanir, framvindu mála og forsendur þeirra. Gagnsæi er grunnur að trausti og ég tel mikilvægt að félagsmenn viti alltaf hvaða ákvarðanir eru teknar og hvers vegna.

Ég mun safna ábendingum frá félagsmönnum og legg áherslu á að sjónarmið þeirra hafi raunveruleg áhrif á ákvarðanatöku. 

Stéttarfélag á að vera samtal, ekki einhliða boðleið.

Að þjónustan sé mannleg, skilvirk og byggð á raunverulegum aðstæðum fólks. Félagsmenn eiga að finna að VR standi með þeim þegar á reynir, ekki aðeins á blaði heldur í verki.

Ég mun vinna náið með stjórn og samstarfsaðilum til að tryggja að þjónustan sé réttmæt, aðgengileg og byggð á þörfum félagsmanna.

Ég vil að þjónusta VR sé aðgengileg, skýr og byggð á raunverulegum þörfum félagsmanna. Það skiptir máli að allir, óháð bakgrunni eða starfsgrein, fái jafna og faglega þjónustu þegar þeir leita til félagsins.

Ég tel mikilvægt að VR veiti öflugan stuðning við andlega heilsu, meðal annars með auknum styrkjum til sálfræðiþjónustu og fræðslu. Andleg vellíðan er lykilforsenda heilbrigðs vinnumarkaðar og betra samfélags.

Ég vil efla aðgengi að endurmenntun og starfsþróun þannig að félagsmenn geti mætt tæknibreytingum og nýjum kröfum vinnumarkaðarins. Menntun á að vera raunhæfur valkostur fyrir fólk á öllum aldri og á mismunandi stigum starfsferilsins.

Ég tel að við getum og eigum að horfa til allra aldurshópa. Ungt fólk þarf góða móttöku og fræðslu inn á vinnumarkaðinn, fólk á miðjum aldri þarf sveigjanleika og stuðning, og eldri félagsmenn eiga að geta lokið starfsferli sínum með reisn og öryggi.

Markmið mitt er að byggja upp traust og stöðugleika með skýrri stefnu og ábyrgri stjórnun. VR á að vera öflugt, sjálfstætt og framsækið félag sem stendur vörð um réttindi félagsmanna, bæði í dag og til framtíðar.