Framtíðarsýn

Sat, 21 Feb 2026 10:30:01 GMT

VR þarf framtíðarsýn - ekki bara næsta samning

Stéttarfélag eins og VR má aldrei hugsa aðeins í stuttum lotum. Kjarasamningar eru mikilvægir, en þeir eru aðeins einn hluti af stærri mynd. Ef félagið ætlar að standa vörð um réttindi félagsmanna til lengri tíma þarf skýra framtíðarsýn og langtímaplön.

Við búum í samfélagi sem er í hraðri breytingu. Tækniþróun, breytt vinnuumhverfi, ný störf og nýjar kröfur gera það að verkum að ákvarðanir sem teknar eru í dag hafa áhrif langt fram í tímann. Þess vegna er ekki nóg að horfa bara fram að næstu samningum - við verðum að hugsa 5-10 ár fram í tímann.

Af hverju langtímahugsun skiptir máli

Langtímahugsun snýst um ábyrgð. Hún snýst um að tryggja að félagið sé tilbúið að mæta breytingum, ekki bregðast við þeim of seint. Þegar stjórn horfir lengra fram í tímann getur hún tekið betri ákvarðanir um forgangsröðun, fjárfestingar og þjónustu við félagsmenn.

Þetta á við um allt: réttindi, kjör, lífeyrismál, menntun og velferð. Félag sem hugsar aðeins til skamms tíma veikist smám saman. Félag sem hugsar til framtíðar styrkist.

Tækni, vinnumarkaður og menntun

Tæknibreytingar eru þegar farnar að hafa mikil áhrif á störf félagsmanna. Sum störf hverfa, önnur breytast og ný verða til. Þetta kallar á að VR hugi markvisst að endurmenntun, starfsþróun og aðgengi að námi - ekki bara í dag, heldur til framtíðar.

Menntun má ekki vera lúxus fyrir fáa. Hún þarf að vera raunhæfur valkostur fyrir fólk á öllum aldri og á mismunandi stigum starfsferilsins. Það er lykilatriði ef við ætlum að tryggja að félagsmenn standi sterkir á vinnumarkaði, líka þegar aðstæður breytast hratt.

Af hverju stjórnin þarf að hugsa 5-10 ár fram í tímann

Stjórn VR ber ábyrgð á því að félagið sé ekki bara rekið vel í dag, heldur líka á morgun.

Ákvarðanir um stefnu, þjónustu og fjármál eiga að byggja á framtíðarsýn, ekki skammtímahugsun.

Með því að horfa 5-10 ár fram í tímann getur stjórnin:

tryggt stöðugleika og traust
byggt upp öfluga þjónustu sem þróast með þörfum félagsmanna
undirbúið félagið fyrir breytingar á vinnumarkaði
tekið ábyrgðarfullar ákvarðanir sem standast tímans tönn

Ég vil sjá VR sem félag sem leiðir, ekki fylgir. Félag sem er tilbúið að taka samtalið um framtíðina, setja skýra stefnu og standa við hana - og það er framtíð sem við öll ættum að vilja.

Allir aldurshópar – ein heild

Fri, 20 Feb 2026 19:28:52 GMT

Allir aldurshópar - ein heild

Í umræðum um stéttarfélög og réttindi launafólks er oft talað um ákveðna hópa: unga fólkið, barnafólk, fólk á miðjum aldri eða eldri félagsmenn. Stundum er jafnvel spurt: Hvaða hóp ætlar þú að leggja mesta áherslu á?

Svarið mitt er einfalt: Alla .

Við erum ekki sundurlausir hópar heldur ein heild. Við erum öll á sömu vegferð - bara á mismunandi stöðum hverju sinni. Og ef okkur tekst að hugsa um alla aldurshópa með virðingu og framtíðarsýn, þá erum við ekki bara að gera rétt gagnvart öðrum, heldur líka okkur sjálfum. Því ef allt fer vel, þá verðum við öll eldri .

Ungt fólk - traustur grunnur frá fyrsta degi

Ungt fólk sem stígur sín fyrstu skref á vinnumarkaði þarf ekki bara starf, heldur góða móttöku . Það skiptir sköpum að onboarding sé skýr, sanngjörn og mannleg. Að ungt fólk viti hver réttindi þess eru, hvert það getur leitað og að það finni að það sé hluti af stærra samhengi.

Ef fyrstu reynslur fólks af vinnumarkaði eru jákvæðar, byggðar á virðingu og stuðningi, þá eflir það bæði einstaklinginn og vinnumenninguna til framtíðar. Þar gegna stéttarfélög lykilhlutverki - ekki sem fjarlæg stofnun, heldur sem raunverulegur bakhjarl.

Fólk á miðjum aldri - jafnvægi og stöðugleiki

Fyrir marga er miðhluti starfsævinnnar sá tími sem er hvað krefjandi. Ábyrgð eykst, bæði í starfi og einkalífi. Fjölskyldulíf, húsnæði, fjárhagur og heilsa þurfa allt að haldast í jafnvægi.

Þar þarf stéttarfélag að standa vörð um sveigjanleika, sanngjörn kjör og raunhæfar lausnir sem styðja fólk í daglegu lífi. Ekki bara í orði, heldur í verki. Þetta snýst um að skapa rými þar sem fólk getur verið duglegt í starfi án þess að fórna heilsu sinni eða fjölskyldulífi.

Eldri félagsmenn - reisn, öryggi og virðing

Eldri félagsmenn hafa byggt upp vinnumarkaðinn eins og við þekkjum hann í dag. Þeir ruddu brautina, börðust fyrir réttindum og lögðu grunninn að þeim kjörum sem við njótum nú.

Við eigum að gera vel við þá sem á undan okkur komu. Tryggja að fólk geti lokið starfsferli sínum með reisn, viðunandi kjörum og öryggi. Að enginn þurfi að óttast efri árin, heldur geti horft til þeirra með ró og tilhlökkun.

Framtíðarsýn sem nær lengra

Stéttarfélag þarf að horfa lengra en fram að næstu kjarasamningum. Það þarf að byggja stefnu sem tekur mið af allri starfsævinni – frá fyrsta vinnudegi til síðasta.

Þegar við hugsum um alla aldurshópa sem eina heild, tökum við ábyrgð á framtíðinni. Við tryggjum samfellu, stöðugleika og traust. Við byggjum félag sem fólk vill tilheyra, alla ævi.

Það er sú sýn sem ég hef að leiðarljósi.

Gerum gott félag betra – fyrir alla, í dag og til framtíðar.

Blogg

Framtíðarsýn

VR þarf framtíðarsýn - ekki bara næsta samning

Allir aldurshópar – ein heild